دا شعب فقرى للشاعر أحمد فؤاد نجم

أحمد فؤاد نجم بمناسبة مد الغاز المصري لإسرائيل
عاوزين نجرب خلقه تانية

دا شعب فقرى
نظرا لأن النعمة فاقت حدها
ولأننا مش قدها
ولأن فعلا انجازاتك
فوق طاقتنا نعدها
ولأننا غرقنا في جمايل
مستحيل حنردها
نستحلفك ……. نسترحمك
نستعطفك …….نستكرمك
ترحمنا من طلعة جنابك حبتين
عايزين نجرب خلقة تانية
ولو يومين
اسمع بقى
إحنا زهقنا من النعيم
ونفسنا في يومين شقا
عايزين نجرب الاضطهاد
ونعوم ونغرق في الفساد
بيني وبينك حضرتك
دا شعب فقرى مايستحقش جنتك
أنا عارفه شعب ماينفعوش
إلا شارون وبلير وبوش
عايز يجرب الامتهان
ويعيش عميل للأمريكان
بيمد ‘غازه’ لإسرائيل
ويومين كمان ويمد نيل
أهو يعنى نشرب ميه واحدة
ندوب في بعض
ماء وماء وماء
ونفض سيرة الانتماء
وبلاها نعرة وطنطنة
تبقى البلاد ‘مستوطنة ‘
متسلطنة بالسرطنة
إيه اللي خدناه م الكرامة والإباء
حبة خطب وكلام…كلام
إحنا راهننا على النظام
ورضينا بخيار السلام
بخيارحنسد عين الشمس بيه
علشان مايطلعش النهار
ويطلع لمين؟
حبة معارضة مغرضين؟
وحسب بيان السلطة
شلة مأجورين؟
ياعم فضك سيرة
وارضى بقسمتك
دا شعب مش فاهم أكيد
يالا اطرده من رحمتك
وإن كنت غاوي الحكم
خليك مطرحك
حاغطس واقب وأعود
بشعب يريحك
راضى وعمره مايجرحك
أخرس ومايسمعش
وأعميلك عينيه
مش كل قرش يبص فيه
مايقولش لأه، وفين، وليه
يضرب ينفض في السليم
وعلى الصراط المستقيم
كل اللي يعرف ينطقه
عاش الزعيم
يحيا الزعيم

أحمد فؤاد نجم

من طرف **ESSAM MAHMOUD** الجمعة ديسمبر 31, 2010 1:11 am

منور يا حكيم واختيار موفق وإليك هذه :

كأنك مفيش - لأحمد فؤاد نجم

كأنك مفيش ..
برغم إن صورك فـ كل الدواير
وكل المداخل وكل المحاور
ومليا الشوارع على كل حيط ..
مطنش علينا وعامل عبيط ..
كأنك مفيش ..
***
يا فرحة قلوبنا رئيسنا ظريف ..
فُكهي ..
إبن نكته ودمه خفيف
فـ عهدك سيادتك فَرَشنا الرصيف
وآخر مُنانا الغُموس والرغيف
وكل أمَّا تُخنُق ندوَّر ..
مفيش !!
***
مسيِّب علينا عصابة حبايبك
فضايح وسرقة ونهب بسبايبك
مابين حزب نجلك .. وهانم جلالتك
وجيش الغوازي إللَّي داير يجاملك
وناملك وقاملك .. وحارسك وأمنك
شبعنا مهانه .. شبعنا لطيش ..!
وأنت .. مفيش !!
***
باعونا فـ حضورك ..
ببركة عِبـيدك وغالي وسرورك
باعوا الأراضي .. وكل المصانع
وباعوا البنوك ..
وقدَّام عِنيك .. صوتنا إتـنبح ..
ننادي عليك ..
إلحق يا ريس : ده باعوا الحديد !!
وأنت منشِّف دماغك عنيد !!
.. كأنك مفيش !!
***
دوشتوا دماغنا ” بجمال ” طلعتك
ومن يومها وإحنا عَبـيد حضرتك
ما تزعلش إني مواطن أبيح
ورافض كلابك فـ شعبك تطيح
فسادهم يا ريِّس واضح .. صريح
قوم بينا صلّح وفتَّش .. وثور
ح نكتب تاريخك ياريِّس بنور
مش تبقى عايش كأنـَّك مفيش !!
***
ورحمة أبوك .. مادام أنت قاعد
عيب لمَّا عُصبة نَـوََر يسحبُوك
م تُقبض عليهم .. م تقطع إيديهم ..
م تعمل عليهم يا ريِّس شاويش
بدل م انت ساكت وقاعد مفيش
***
ياريس علىّ الطلاق تعبانين !!
ياريس علىّ الحرام كفرانين !!
صبرنا سنين ..
سيادتك مسلطن
وشعبك وناسك بتاكل مسرطن
وتشرب مجاري وميت سم هاري ..
ومش دريانين !!
ما تنهض يا ريس تلم الديابه ؟!!
ده شعبك غلابه ..
ومليان طيابه ..
وهوَّ الشفاعة ف يوم الحساب
وهما البطانة الحُثاله الكلاب
ما يملاش عنيهم غير التراب
وليهم ضوافر
وميت ألف ناب
وواقفين لشعبك ورا كل باب
لإمتى ح تسكت وليه الغياب ؟
ده ياما ممالك طواها التراب
حياتنا ياريس تعب فوق عذاب
يا ريس ” شريفك ” ماهوَّاش شريف !!
” نظيفك ” يا ريس ماهوَّاش نظيف !!
وحتى ” حبيبك ” ماهواش حبـيب !!
وأنا غصب عني .. خلاص إستويت ..
بـ غـُلبي إنحنيت ..
وطلعان عنيا .. وصعبان عليا
بحسبة بسيطة ومن غير خريطه ..
وكونك مفيش .. لقيت متساويش
ومش فارقه أعيش ..
نويت أشتكيك للِّي فوقي وفوقك
وأصلي الفرايض ..عسى يفـُك طُوقـك
قالولي إللي يسجد عدو النظام !!
حاولت أحكي حالي ..!!
قالولي الحكاوي نميمة وحرام !!
فكرت أكتب ..
لقيتكم سيادتك منعتوا الكلام !!
فقررت أحلم ..
هاحلم سيادتك وأفُك اللِّجام
ولو مش هيعجب سيادتك يا فندم
وصِّي العساكر .. تاخُدني أمَّا انام !!
***
حلمت إني شعب ..!
حلمت إني شعب ومصلوب بطولي
على أرض سمرا
ودمي بينـزف ومليان جروح
وفوق صدري جمرة
يميني مربّط على أرض طابا
شمالي ممسمر فـ “أولاد علي”
ورجلي على جزع نخلة فـ “حلايب”
ومرتاح براسي على حِجْر مصر
وشوفتك ياريس ..كأنك ولي ..
كأنك نبي ..
فـ إيدك عصاية وليك معجزات

وانا فـ جنَّه خضره .. وتحتي جداول ..
ومن فوقي نور .. وريحة بخور ..
همست ف ودانك بآخر وصيّة :
إنسى إللي فاتك ..
هننسى الأسية .. !!
أمانه عليك ..
حُط الوطن جُوَّه نِنِّي عينيك
كرامة عيالنا أمانة ف إيديك
بحق إللي بينّا يا ريِّس وبـينك
وحَق اليَمِين و” الكتاب ” فى يمينك
بحق الشهيد .. إللي رافع جبينك
وجيش إنتصارك فى يوم العبور
وجيل حُر طالع .. وعدته بدور
لملم عيالك .. وجمَّع فـ مالك
وإسحب ” جمالك ” وسيبنا وغور

من طرف **نزار شجاع** الجمعة ديسمبر 31, 2010 6:27 am

يعني الدكتور طارق والسيد عصام أحلى من بعض
وماحدش ماكلها غير البتاع يلي باع البتاع بكم بتاع
كل عام وأنتم بخير يا أغلى اثنين

دكتور عصام شكراً لعرضك و مرورك .
الأخ نزار شكراً لمرورك و أنت من أحلى الحلوين .
مع أطيب الأمنيات للجميع.

سيدى الرئيس
...............................................................

احمد فؤاد نجم
......................

في عيد ميلادك الكام وسبعين
كل سنة وانت طيب
واحنا مش طيبين
كل سنة وانت حاكم
واحنا محكومين
واحنا مظلومين
واحنا متهانين
وانت راكب واحنا مركوبين
ويا تري يا حبيب الملايين
فاكرنا ولا احنا خلاص منسيين
فاكر المعتقلين
فاكر الجعانين
فاكر المشردين
فاكر اللي ماتو محروقين
فاكر الغرقانين
الله يكون في عونك - ها تفتكر مين وللا مين
في عيد ميلادك الكام وسبعين
بقول لك كلمتين

الأوله

شيلتنا طين
وهل تعلم أن النيل بقي رشاح
والجو أصبح بيئة والعيشة ولعة
والشرفا قلوبهم عالبلد والعة
وانت عاملهم مذبحة ولا بتاعة القلعة
والإقتصاد سداح
والسرقة بقت كفاح
ومصر متاحة بس للسياح
وعرض البلد بقي مستباح

والثانية

ورتنا الويل
داالخطوة في عهدك بقت ميل
والضحك بقي نواح و عويل
والكوسة
عارف الكوسة
ممكن أقول لك فيها مواويل
والجامعة بقت يا إما كباريه أو دار مسنين
والشباب معظمهم من غير خمرة سكرانين
والعلم عز علي المتعلمين
والأساتذة بقم دجالين
والقادة بقم طبالين
واديني في الهايف يا حبيب الملايين

والثالثة

عارف اليابانيين
زمان في سنة اتنين و خمسين
كان عندنا تروماي و كان عندنا علم و متعلمين
وثقافة ومثقفين
وأدبا وعلما وفنانين
وكانو اليابانيين
بالنووي لسه مضروبين
و للصدقة مستحقين
دلوقتي إحنا فين و هما فين
هما فوق و احنا في أسفل سافلين

والرابعة

أمن بلدنا بقي تنين
والمحاكم اتملت مظالم
والعدالة بقت كمالة
وكلمة الحق في الزبالة
وأصحابها في الزنازين

والخامسة

القطاع العام....عام
والفساد.....ساد
وفي جتة بلدنا بيرعي
أفتكر لجنابك إيه و للا إيه
وكل ذكري ليك بدمعة
آآآآآآآآه
آآآآآآآآه
أنا كنت حالف ميت يمين
أكملهم لك تمنية و سبعين
بس ها كفيهم ورق منين

و كل سنة و انت واحنا طيبين ............

الآخ الغالي طارق

اختيار رائع لهذا الشاعر الثوري المناظل

وقصيدة رائعةما اتحفتنا بها

شكرأً لأخي عصام على الزيادة الحلوة

مع كل الحب

من طرف MIMO الأحد يناير 02, 2011 10:51 am

قصائد رائعة لشاعر شعبي كبير مميز اتحفتونا بها

شكر كبير لكم جميع وخاص لآخينا الدكتور طارق

تحياتي سيدي

الأخ ميمو شكراً لمرورك ...
الأخت خلود نورتي الصفحة بأضافتك الجميلة ...

و هذه تحفة جديدة للشاعر أحمد فؤاد نجم

طاطي راسك - أحمد فؤاد نجم

طاطي راسك طاطي طاطي .. انت ف وطن ديمقراطي ..
انت بتنعم بالحرية ..
بس بشرط تكون مطاطي

لما تكون شغال بذمة ..
خايف على مصلحة الأمة ..
شغلك يطلع من غير لازمة ..
علشان مبيعلاش غير واطي

طاطي راسك طاطي طاطي .. انت ف وطن ديمقراطي

لما حاميها يكون حراميها ..
وبلاده ورا ضهره راميها ..
طالع نازل واكل فيها ..
مسنود بالبدلة الظباطي

طاطي راسك طاطي طاطي .. انت ف وطن ديمقراطي

لما شقاك يصبح مش ليك ..
فقرك سد السكة عليك تتلفّت تلقى حواليك ..
إما حرامي و إما عقاطي

طاطي راسك طاطي طاطي .. انت ف وطن ديمقراطي

لماتلاقي بلاد الدنيا ..
فيها البني آدم حاجة تانية ..
وانت في الطبقات الدنيا ..
قرد مسلسل أو وطواطي

طاطي راسك طاطي طاطي .. انت ف وطن ديمقراطي

لما الجهلة يبقوا أمامك ..
أو فوقك ماسكين ف زمامك ..
ويسوقك ع الهلكة إمامك ..
تشرب م السم السقراطي

طاطي راسك طاطي طاطي .. انت ف وطن ديمقراطي

لما الكلمة تكون بتدينك ..
لما تخبي ف قلبك دينك ..
لما الذل أشوفه ف عينك ..
هات إحباطك على إحباطي

طاطي راسك طاطي طاطي انت ف وطن ديمقراطي .. انت ف وطن ديمقراطي

*******

مع أطيب الأمنيات

من طرف غسان الإثنين يناير 24, 2011 11:33 am

سيدي الكريم

ومن لايروق له شعر هذا الانسان الثوري الكبير

والشكر منقول لك يا حكيمنا على روعة هذا الآختيار الجميل

دائماً تحتار ألآجمل

مشكوررررررررر

من طرف ضحكة طفوله الأربعاء فبراير 22, 2012 11:41 pm

اختياار موفق
دكتورنا العزيز
الف شكر لك
في انتظار جديدك المميز

اخي الغالي... دكتورنا العزيز... تحية وبعد

طال الوقت... وطال الزمن

وما زلنا ننتظر عودتك الينا

اشتقنا لك جداً... لحروفك الغالية....

لكتاباتك التي لاتنتهي منها...

كم نتوق لك ايها الغالي

عد الينا فقد اشتقنا لك شوقاً كبيراً

عد الينا فقد تاقت ارواحنا كثيراً لك

عسى ان تسمعنا وتعود بشوقنا ايها الآخ الغالي

تحياتي واشواقي وياهلا

دا شعب فقرى للشاعر أحمد فؤاد نجم

دا شعب فقرى للشاعر أحمد فؤاد نجم

رد: دا شعب فقرى للشاعر أحمد فؤاد نجم

رد: دا شعب فقرى للشاعر أحمد فؤاد نجم

رد: دا شعب فقرى للشاعر أحمد فؤاد نجم

رد: دا شعب فقرى للشاعر أحمد فؤاد نجم

رد: دا شعب فقرى للشاعر أحمد فؤاد نجم

رد: دا شعب فقرى للشاعر أحمد فؤاد نجم

رد: دا شعب فقرى للشاعر أحمد فؤاد نجم

رد: دا شعب فقرى للشاعر أحمد فؤاد نجم

رد: دا شعب فقرى للشاعر أحمد فؤاد نجم