أحمد فؤاد نجم ... نفسي في صنف حشيش

من طرف **ابو مجد** الجمعة نوفمبر 05, 2010 7:30 am

نفسي في صنف حشيش

أحمد فؤاد نجم

ينمل الدماغ وينظف النخاشيش ... علشان انسى طابور العيش

واخش فى الغيبوبه وانسى مشكلة الانبوبه ... وانسى بلدنا المنهوبه

وانسى اللى بيجهزوه ... علشان يبقى رئيس للمخروبه

وابقى مسطول وانسى اى مسئول .. من اللى سابوا الناس فى السيول

وانسى ان نظيف ... اتجوز وبقى بيعول

وانسى مجلس الشعب وفتحى سرور ... وانسى البرادعى وايمن نور

وانسى شوبير ومرتضى منصور ... وانسى تعديل الدستور

وانسى اللى ساكنين فى القبور ... انسى انفلونزا الطيور

وانسى مشاريعنا الفاشله ..... فى توشكى وابو طرطور

واخش فى الاستهبال .... وانسى علاء وجمال

وانسى التوريث ... و النيل اللى نازلين فيه تلويث

وانسى ان منتخبنا كويس ... زى ماقال الريس

وانسى تصدير الغاز ... واحنا عندنا ازمة بوتاجاز

وانسى قطر العياط .... وانسى قطر الصعيد

وانسى احمد عز واحتكار الحديد

وانسى زحمة المواصلات ...وانسى الانتخابات

وانسى فتاوى الفضائيات ... وانسى العشوائيات

وانسى فشل التعليم ... وانسى هشام طلعت وسوزان تميم

وانسى الاهرام وانسى الاخبار ... و انسي ثروة الريس ال 40 مليار

اللى مش بالجنيه المعفن لا بالدولار ... وانسى انه خلى بلدنا افقر من زنجبار

وانسى المعارضه وانسى الاحزاب .... وانسى تامر حسنى وعمرو دياب

وانسي ارضاع الكبير و شرب بول البعير .... و انسى انفلونزا الخنازير

وانسى اوروبا وامريكا وانسى الصين ... المتقدمين عننا بسنين

وانسى البيت بيتك و تامر امين .... وانسى ان كيلو اللحمه بقى بتمانين

وانسى اننا فى الزباله غرقانين ...وانسى الماده سته وسبعين

والماده سبعه وسبعين ...وانسى فريق الساجدين

وانسى الزمالك والاهلي ... وانسى اليسا وهيفاء وهبي

وانسى الفول والطعميه .... وازهى عصور الديموقراطيه

وجامعة الدول العربية الجماهيريه الليبيه ... و الكفيل في السعودية

وانسى بطرس غالى و الضريبه العقاريه

وانسى الطلعه الاولى الجويه ... و المصالحة الفلسطينية

وانسى فتح وانسى حماس ... وانسى هنيه ومحمود عباس

وانسى العراق وافغانستان ... وانسى ايران و انسى باكستان

وانسى ماما سوزان وانسى الاخوان .. وانسى محمد ابراهيم سليمان

وانسى ان حد من 0900 يطلع كسبان

وانسى انى مديون وانسى كل ممثله حيزبون .... بتاخد فى المسلسل كام مليون

وانسى ايامنا السوده ... واحضان طنطاوى والبابا شنوده

وانسى القذافى والبشير ... وانسى كل ملك وكل امير

اللى حاكمين من سنين ... من غير تغيير

وعلشان اعرف ان الصنف كويس ... لازم ارشح نفسى وابقى الريس

جديد ... احمد فؤاد نجم

جيفارا مات

جيفارا مات

جيفارا مات

آخر خبر ف الراديوهات

و ف الكنايس

والجوامع

و ف الحواري

و الشوارع

و ع القهاوي وع البارات

جيفارا مات

جيفارا مات

و اتمد حبل الدردشة و التعليقات

مات المناضل المثال

يا ميت خسارة ع الرجال

مات الجدع فوق مدفعه جوة الغابات

جسد نضاله بمصرعه

و من سكات

لا طبالين يفرقعوا

ولا اعلانات

ما رأيكم دام عزكم

يا انتيكات

يا غرقانين

ف الماكولات و الملبوسات

يا دفيانين

ومولعين الدفايات

يا محفلطين

يا ملمعين يا جميسنات

يا بتوع نضال آخر زمن

ف العوامات

ما رأيكم دام عزكم

جيفارا مات

لا طنطنة

و لا شنشنة

و لا اعلامات و استعلامات

عيني عليه ساعة القضا

من غير رفاقة تودعه

يطلع أنينه للفضا

يزعق و لا مين يسمعه

يمكن صرخ من الألم

من لسعة النا ف الحشا

يمكن ضحك

أو ابتسم

أو انتشى

يمكن لفظ آخر نفس كلمة وداع

لجل الجياع

يمكن وصية للي حاضنين القضية

بالصراع

صور كثير ملو الخيال

و ألف مليون احتمال

لكن أكيد و لا جدال

جيفارا مات موتة رجال

ياشغالين و محرومين

يا مسلسلين

رجلين و راس

خلاص خلاص

ما لكوش خلاص

غير بالبنادق و الرصاص

دا منطق العصر السعيد

عصرالزنوج و الأمريكان

الكلمة للنار و الحديد

و العدل اخرس أو جبان

صرخة جيفارا يا عبيد

في أي موطن أو مكان

ما فيش بديل

ما فيش مناص

يا تجهزو جيش الخلاص

يا تقولو ع العالم

خلاص

الغالي أبو مجد

أختيار رائع وموفق لهذا الآنسان الثائر والثوري

دائماً تتحفنا بالاجمل والآروع

لك كل الحب والتقدير واسمح لي أن اضيف هذه القصيدة

التي كتبها وغناها الشيخ امام.... جيفارا مات

محبتي لك

من طرف **نزار شجاع** الإثنين نوفمبر 08, 2010 5:14 am

أذا الشمس غرقت في بحر الغمام
ومدت على الدنيا موجة ظلام
وتاه البصر في العيون والبصاير
وضاع الطريق في الخطوط والدواير
يا ساير يا داير
يا أبو المفهومة
ما ألكش طريق غير ( عيون الكلام )
**********************************

أبو مجد الغالي تسلم عيونك

من طرف **سحر الشرق** الإثنين نوفمبر 08, 2010 5:52 am

الرعب
مرعوبين مرعوبين مرعوبين
مش باقولّك يا حبيبي مرعوبين
اللي رقصوا ف حضن كارتر
مرعوبين
واللي كان فاكرينه عنتر
مرعوبين
واللي سافروا لجولدا ماير
مرعوبين
واللي بيغلّوا السكاير
مرعوبين
والنسايب والقرايب
مرعوبين
والمشايخ ف الزكايب
مرعوبين
والسفاك المصريكاني
مرعوبين
والفراخ الأمريكاني مرعوبين
كل حكّام الخيانة المأجورين
والسماسرة والحشم والطباخين
مهما حاولوا يخوّفوكوا بالعساكر
فتّشوهم حتلاقوهن مرعوبين
مش باقولك يا حبيبي
مرعوبين
شكرا أبو المجد على ايقاظ الذاكرة لهذا الشاعر العظيم

من طرف **سحر الشرق** الإثنين نوفمبر 08, 2010 9:40 pm

الثورة
مارد رفض وانتفض
زلزل عروش العار
الشمس ولاّ الجبل
ولاّالمحيط هدّار
ولاّ القمر ف السما
فجّر سحاب النار
ولاّ الربيع انتشر
غطّى الوجود ثوّار
ولاّ النشيد انطلق
عالي على الأسوار
طيّر سلاح سلاح الحرس
من لمسة الأوتار
ولاّ نسيم الصبا
ولاّهوا الاعصار
انت الجميع كلّهم
والكل فيك حضّار
ياشعب لمّا رفض
يا شعب لمّا اختار
سطّ بدم الشرف
أنشودة للأحرار
نار الخيانة حطب
نار الشعوب
صبّار.
وهذه القصيدة أيضا من روائع أحمد فؤاد النجم

أحمد فؤاد نجم ... نفسي في صنف حشيش

أحمد فؤاد نجم ... نفسي في صنف حشيش

رد: أحمد فؤاد نجم ... نفسي في صنف حشيش

رد: أحمد فؤاد نجم ... نفسي في صنف حشيش

رد: أحمد فؤاد نجم ... نفسي في صنف حشيش

رد: أحمد فؤاد نجم ... نفسي في صنف حشيش